Хӏакъикъаталдаги учителасул букӏунаро бокьичӏого гьабулеб хӏалтӏи, гьесие щолеб харжалъухъ хал гьабидал. Ратизе бегьула гьезул кьеразулъги рес къотӏун школалдаго хутӏаралги. Амма, аслияб къагӏидаялда босани, гьенир руго учителасул хӏалтӏухъ ккараб рокьуца школалда ккурал хӏикматал гӏадамал. Ракӏ-ракӏалъ бокьичӏони, кинаб бугониги хӏасил кьоларо учителасул хӏалтӏуца.
Релъиги, гӏодиги, квешлъиги, лъикӏлъиги, хӏалуцинги, сабруги, берцинлъиги, гьайбатлъиги, хинлъиги, цӏоройги. Гьеб киналъулго тӏогьиб — Рокьиги. Гьалеха учителасулги цӏалдохъанасулги цоцазда жиб бараб ва бухьараб гӏумру.
Цебе бачӏунеб буго 1984 сон. Институтги лъугӏун, росдал хъутаналде хӏалтӏизе уней дир ботӏролъе рачӏунел рукӏана кӏвеладай дида цӏалдохъабазул божилъи ритӏухъ гьабизеян абурал хӏинкъарал пикраби.
— Дун йоржун уней йиго гьорол хехлъиялда, талихӏалъул хӏанчӏил куркьбаздаги рекӏун, дирго анищазде данде.
Гьале тӏоцебесеб дарс. Дихъ ралагьарал чӏегӏерал, цӏахӏилал, хъахӏилал, сурмиял берал… Гьале тӏоцебесеб дарс.
— Рорчӏами, лъимал…
Долдаса нахъе ана 36 сон. Гьедигӏанго сонал руго дир «Дун — учитель» абураб школалъулаб гӏумруялъул хъвай-хъвагӏаял гьарураб тетрадалъеги.
Цӏидасанги гӏедегӏулей йиго дирго анищазул гъасде, гьениб гьелегьун бугеб рокьул цӏадул хинлъиялъ бачунеб гъургъуралъухъ гӏенеккизе. Гьезул тӏогьиб бугеб гучаб ва хӏасратаб, гьелдаго цадахъ хӏеренаб ва недегьаб рокьул щвалде щолей йигей дие жакъаги гӏажаибаб асар гьабула, цӏалдохъабазул бицине щведал.
Унго-унгоги, гьез дир гӏумруялъе кьунщинаб хӏухьелги, рухӏги, жанги. Диего хасаб гъасда бакизе дирго къисматалъул цӏа щвечӏей дие гьезул рокьиги, гьимиги, кӏалъайги букӏана цӏалъунги, канлъунги, талихӏлъунги.
Доб тӏоцебесеб къоялдаса нахъе дир хьолбохъа нахъе инчӏо цӏалдохъабаз дие кьолеб бугеб талихӏ. Гьезул кумекалдалъун дицаго ургъарал Талихӏалъул дарсал жакъаги ритӏула, гьел цӏияб гӏумруялде нуха регӏулаго, гьезда дандчӏвай гьабизе. Цо цӏалдохъанасегицин дир Талихӏалъул дарсаз кумек гьабун батани, дунги яхун ятила доб дирго анищалъул тӏогьиб бугеб Рокьул тӏараде. Гьелда къвалги бан ругел дирго анищаз цӏидасанги гьогьомизабула дир гӏумру.
Сонги, жакъаги, метерги — кидаго урхъун йикӏуна дун дир гӏумруялъул тӏохьол тӏанчазда цӏалдохъабаз хъвараб бацӏцӏадаб къисаялъухъ. Цо гьелъул берцинлъи, тӏадегӏанлъи.
Дир бакъул чӏоразда гьоркьорги руго гьезул чӏорал. Чан кьерхарал къоял чӏаго гьарурал гьез дие, чан къваридал дир сардазе кӏиабилеб хӏухьел кьураб гьез, чан нухалъ еэдарай, чан нухалъ баараб дир бакъалда.
Учительги цӏалдохъанги. Рокьукълъиялъе гьитӏинабгицин бакӏ гьечӏеб бакъулаб улка. Гьеб улкаялда гӏумру гьабун ругел учителасулги цӏалдохъабазулги гӏумруялъул бидурихьал цоцазда рухьарал руго. Гьенисан хьвадулеб бидул тӏадецуялда бараб буго гьеб улкаялда гӏумру гьабун ругезул къисматги…
Цӏидасанги бегулеб буго дица дирго хӏикматаб тетрадь. Ва цӏидасанги гьеб тӏехьалъул тӏанчазда иргаялда дие гьимулел руго дирго цӏалдохъабазул сипатал.
Гьезул щибалъ абулеб бугин кколеб буго:
— Йорчӏами, учитель!…
— Рорчӏами, лъимал!…
Ва цӏидасанги байбихьулеб буго дир тетрадалъул иргадулаб бутӏа…
Хӏурматиял учительзаби!
Баркула нужеда дунялалдаго бищунго гӏаданлъи цӏикӏкӏарал, цогидазул ракӏазулъ лъикӏлъиялъул мугьал рекьулел гӏадамазул байрам. Нилъ руго бищунго талихӏал гӏадамал. Щайгурелъул нилъеца ракьалде хьалеб буго букӏинесеб гӏелалъул талихӏалъул мугьал. Цогидазе талихӏ бикьи — гьеб гурищ нилъерго талихӏги. Кӏиябго талихӏги цолъун лъугьараб гӏумруялъул магӏнаги захӏмалъиги цохӏо нилъедаго гурони бичӏчӏуларо. Гьеле гьединаб тӏадегӏанаб багьа буго нилъер талихӏалъул. Ругищ гьелдаса берцинаб цоги талихӏ бугел хъулухъазул гӏадамал?!
Байрамгун, учитель!