Казбек районалъул Дилим росулъа жамгӏияв хӏаракатчи, рагъул ветераназул советалъул член Мухӏамадрасул Мадаев лъаларев чи Салатавиялдаго ватиларо. Гӏемерал шапакъатазе мустахӏикълъарав гьесулгун букӏараб гара-чӏвариялда гьадин бицана гьес:
— 1941 соналъул 30 декабралда Кӏудияб Ватӏанияб рагъде эмен унеб къоялъ, дун вукӏана щуго сон барав вас. Гьеб къоялъ дир инсуца, кодовеги вачун, каранде къана дун. Щибго бичӏчӏулареб лъимер букӏиндал, дун хаган валагьун хутӏана гьесул кӏудияб тӏогърохъ. Кӏудияб хъизамалъул тӏалаб-агъаз бугев чи вукӏана мунагьал чурад. Гьединавлъун хутӏана гьев дир рекӏелъги.
Инсул кагъат бачӏана Грузиялъул Гори шагьаралдаса. Гьенир рагъуе ругьун гьарулел рукӏун руго Дагъистаналдаса фронталде ритӏизе ругел гӏолохъаби. Гьесул полкалда Дилималдаса гӏезегӏан чиги вукӏун вуго. Инвалидлъун лъугьун росулъе вуссарав инсул вацгӏалас бицана пашманаб хабар. Цо рагъулъ цадахъго чӏван вуго Дилималдаса ичӏгояв. Гьезда гьоркьов вукӏун вуго дир эменги.
Гьедин бесдаллъана Мухӏамадрасул, вацал Гӏали, Мухӏамадзагьид, яцал Зулайхат ва Умузагьидат. Щуго лъимадул тӏалаб-агъаз тӏаде ккедал, колхозалда хӏалтӏана къороллъуда хутӏарай Мадаевасул лъади Шамалай. Цӏикӏкӏарав вас Гӏалил букӏана 17 сон, гьесги хадусезги кӏвараб кумек гьабулаан эбелалъе.
1954 соналда школа лъугӏидал, Мухӏамадрасул цӏализе лъугьана Дагъистаналъул росдал магӏишаталъул институталъул зоотехникияб факультеталде. Гьеб лъугӏидал хӏалтӏизе лъугьана райисполкомалъул росдал магӏишаталъул управлениялде кӏудияв зоотехниклъун, хадусел соназда нухмалъи гьабуна «Дилим» совхозалъе.
Н. Хрущёвасул заманалда, Сталинил цӏаралда бугеб колхозалъул кьучӏалда гӏуцӏана хӏалбихьиялъулабгун мисалияб магӏишат. Мадаев витӏана гьениве, бетӏерав зоотехниклъун хӏалтӏизе. Хадурги рукӏана хиса-басиял. Хасго ахирал соназда районалда ккарал гьезул хӏакъалъулъги бицана захӏматалъул ветеранас.
— Дагьаб цебе лъана ахираб щуго соналда жаниб районалъул гӏадамазул доход 75 проценталъ цӏикӏкӏун букӏин. Ленинаулалда рагьана участкаялъулаб больница, Алмахъалда — фельдшерлъиялъулабгун акушерлъиялъул пункт, Буртунаялда — школалъе мина баялъул хӏалтӏи рагӏалде бахъунеб буго.
Рамазан Гӏабдулатӏипов бетӏерлъун вугеб заманалда гъоркь рукӏаразде тӏаде гӏезабуна 15 гектаралда ах. Районалда рагьана пластикалъул гордал ва нуцӏби хӏадур гьарулеб цех, бетон гьабулеб гьитӏинабго завод, гӏанкӏудал гьан хӏадур гьабулеб фабрика. Баркала буго районалъул нухмалъуда рукӏаразе, гьезул нухмалъиялда гъоркь цебетӏуна халкъалъул гӏумру.
Мухӏамадрасулил лъади Убайгьанатил эмен Мухӏамад Абуязидов фронталде ана 1941 соналъул 23 июналда. Вагъана Киевалъул, Харьковалъул, Смоленскиялъул рахъалда. Сталинградалъе гӏоло рагъулъ лъабцӏул лъукъун вукӏиналда бан, рокъове виччан вачӏана. Гьев мустахӏикълъана лъабабилеб даражаялъул Реццалъул ва тӏоцебесеб даражаялъул Кӏудияб Ватӏанияб рагъул орденазе, «Кавказ цӏуниялъе гӏоло», Сталинградалъе гӏоло, Георгий Жуковасул ва «Кӏудияб Ватӏанияб рагъул соназда бахӏарчияб захӏматалъе гӏоло» медалазе.
— Росасда цадахъ гӏумру гьабулеб буго 1958 соналдаса нахъе, — ян бицана гьелъ. – Лъикӏаб тарбия кьун гӏезабуна щуго лъимер. Гьезул киназулго буго тӏадегӏанаб лъайги.
Кигӏанго рекӏее къабуллъулареб букӏаниги, къисматалъ жиндирго къуват бихьизабула инсанасул гӏумруялъулъ. Студентлъиялъул бищунго аваданаб гӏумруялда вугев цохӏо вукӏарав вас нагагьаб балагьалдалъун гӏолохъанго хвеялъул бухӏи кӏиязулго каранда кинго секьулеб гьечӏо, гьелдаса гӏезегӏан заман аниги.
Гьединаб бакӏаб къварилъиялъул къорикье кканиги, рукъ цӏурал лъималазул тӏалаб тӏаде беганиги, тӏатӏала квералги лъун чӏезе ругьунлъарай гӏадан гуро Убайгьанат. Пенсиялде инегӏан хӏалтӏана районалъул ветеринарияб станциялда санитаркалъун.