— Гӏумру, лахӏзаталъ лъалхъе!
— Дир заман гьечӏо. Киназулго гьари тӏубазе кӏоларо.
— Щай?
— Дуда рагӏичӏебищ гьаб хабар?
— Кинаб?
— Цоги лъикӏав инсанас тана дуниял. Камуна гьесул гьимиги, сабруги, гӏакълуги сверухъ ругезе. Диеги бокьун буго гьесухъ угьдизе. Те дун цодагьалъги дирго пикрабазда. Бокьун буго цоги, ахирисеб нухалда гьесул хӏакъалъулъ гӏадамазе бицине.
Диргун къо-лъикӏги гьабун, ахирисеб сапаралде ана пагьму-гьунар бугев шагӏир Мухӏамад Патахӏов. Гьев лъикӏ лъалаан магӏарулазда гуревги. Аскӏор хӏалтӏулезда гьоркьоб гьесул букӏараб къадруялъеги захӏмалъун буго гьев ками. Гьебги гӏодилеб буго дидаго цадахъ. Кидаялиго адабияталъул дунялалда гьелчелеб букӏараб гьесул гӏагараб Хунзахъ районги пашманго буго. Гьелъул адабияталъул гъотӏол цоги гӏаркьел бекана, додигӏан, магӏарул адабиятилан цӏар бугеб шагӏирзаби-хъвадарухъабаздалъун бечедаб улка бесдаллъулеб буго дагь-дагьккун.
Мухӏамадица ахӏулеб бугин кколеб буго:
— Гуро, киданиги къине гьечӏо магӏарухъ адабияталъул ицц. Шагӏирзаби-хъвадарухъаби холаро, гӏицӏго рухӏ уна гьезул, гьаб дунялги тун. Гьезул гьаракьалъе къин гьечӏо. Абадияб дунялалде шагӏирасдаго цадахъ унаро гьесул къалмикьа арал асарал. Гьес гьел ракьалдаго тола, гьале живги жиндир гьаракьиланги абун. Гьаниве щолаго, дидаги рагӏулеб буго дирго ракьцоял шагӏирзабазул шигӏрабазул ахӏи. Нужеда лъалебаниха, гӏагараб росдал ракьул чохьониб дида щолеб бугеб лъикӏаб макьу. Бугониги, гӏащикълъун вуго гьениб, ракьалда букӏаралъухъ. Цоги нухалда рикӏкӏинищ нужее дирго кечӏ. Лъала нужги, ракьалда тарал, дихъги урхъун ратулеллъи. Гьале гьадинаб букӏана дир гӏумру гьабулеб къагӏида. Гьелъие къимат ракьалда тараз кьезе батила:
— Ракьалъ реэдаралъ жахӏда бижичӏо,
Бичас тӏокӏ гьарурахъ урхъи гӏорцӏичӏо,
Рухӏдаллъи гурони, хӏалхъублъи лъачӏо —
Лъаларо, лъаларо, лъикӏищ гьеб, квешищ?
Рокьи дида лъана, ракӏалъ малъараб,
Рикъзи дие гӏуна, дида батараб,
Насиб алжанлъана, Аллагьас кьураб —
Лъаларо, лъаларо, лъикӏищ гьеб, квешищ?
Гьалеха гьадин, дунялалда гьабуралда щибниги ракӏ бухӏизе жо батичӏо Мухӏамадида. Гӏумруялъул гьединаб ахиралда бокьарав чи рухӏдаллъизе бегьула унго-унголъунги.
Аскӏор хӏалтӏулел рукӏанщиназе хирияв, гьезул рекӏелгъеялъе гӏоло махсара гӏемерав, тӏекълъиялда рекъоларев, унтиледухъ лъиданиги рагӏи абичӏев, дунялалъул магӏишаталда хадув хапдечӏев, цӏар-рецц къваригӏинчӏев, щваралда гӏейги гьабун, сабуралда вукӏарав, бищунго лъикӏал гӏадамазул цояв, къисматалъ кьуралда разияв, гьебгун къацандизе ракӏалдецин ккечӏев – гьеле гьединав вукӏана Патахӏов. Гьедин гурищха нилъеца гьесда абулеб букӏараб.
— Сихӏкъотӏун гӏенеккун йиго дун, гӏумруялъулъ бицунеб бугеб гьуинаб къисаялъухъ. Щай гьеб гьуинлъараб? Щайгурелъул гьелъулъ бессун букӏана шагӏирасул бацӏцӏадаб, роцӏараб гӏумру. Жакъа досул гӏумруялъ рачунел пашманал сариназул гъасда кӏусарай дихъе цӏидасанги гьоболлъухъ рачӏунел руго шагӏирасул шигӏраби. Ракьалда бугеб тӏекълъи хӏехьезе кӏвечӏев гьев лъутулев вуго лъимерлъиялъул улкаялде, рацӏцӏалъиялде ва роцӏеналде:
— Дунго дидасаго тӏурулев вуго,
Тӏад вуссун нахъеги лъимерлъиялде,
Ралъдал цӏамхӏалаб лъим къватӏибе пунхъун,
Цӏорораб иццалда урхъун хӏохьбазе…
Шагӏирасул ахирисеб сапаралъ чӏей гьабуна гӏагараб Сивухъ росдал рагӏалда. Гьеб сапаралъул ахирги жиб гӏадаб берцинаб бугилан щурулеб буго гьесул гӏумруялъ.
Хвалил рагӏдукье ккечӏо шагӏирасул гӏумру. Гьесул гӏумруялъул бакъул чӏораз къалъизабуна ахирисеб сапаралде нух.