Араб анкьалда Махӏачхъалаялъул Семендер поселокалда бугеб №58 школалда тӏобитӏана санайилаб «Анищазул ва кочӏол куркьбазда» абураб этнофестиваль. Исана гьеб сайгъат гьабун букӏана Россиялъул халкъазул цолъиялъул къоялде. Гьеб къоялъ школалъул азбаралде ва жанахӏалъубе, щибаб кабинет-классалде данделъун букӏанин гьитӏинаб Дагъистанилан абунигицин мекъи букӏинаро.
Киса-кирего рукӏана мугӏрузул улкаялъул гӏамал-хасияталъулги, маданияталъулги, адабияталъулги бицунел къадал газеталги выставкабиги. Школалъул азбаралъуре лъугьарабго, рагӏизе лъугьана Дагъистаналъул халкъазул миллияб музыкаги ахӏулел кучӏдулги. Гьенибго Дагъистаналъул мустахӏикъав артист, палугьан Асхӏабгӏали Хӏасанов хӏадурлъулев вугоан жиндирго гӏисинал гьунарчагӏигун фестивалалъул гӏахьалчагӏазда цеве вахъине. Школалъул жанахӏалъуб гӏуцӏун букӏана халкъиял махщелазул выставка. Жиндирго цӏулал тӏагӏелалги росун, гьенив гӏахьаллъизе вачӏун вугоан Унсоколоса машгьурав устар Мухӏамадгӏалиги. Гьенибго бугоан школалъул гӏицӏго ясаздаса гӏуцӏараб музыкалияб ансамбльги. Гьез миллиял музыкалиял алатазда рачунел рукӏана Дагъистаналъул халкъазул бакънал. Гьенибго – кьурди-хъатги. Дандеруссиналда гӏахьаллъизе рачӏаразда гьоркьор рукӏана тахшагьаралъул лъай кьеялъул управлениялъул начальник Шаганэ Баймурзаева, управлениялъул отделалъул начальник Зулхӏижат Гӏабдулжалилова, управлениялъул рахьдал мацӏазул куратор Мухӏамад Манапов, шагьаралъул школазул рахьдал мацӏазул учительзаби, шагӏирзаби, хъвадарухъаби, журналистал ва Дагъистаналъул миллияб культураялъул адаб гьабулел цогидал дагъистаниялги.
Фестиваль байбихьана гӏисинал гьунарчагӏи-палугьабазул церерахъиналдаса. Хадуб школалъул данделъабазул залалда байбихьана фестивалалъул аслияб бутӏа. Дагъистаналъул миллияб байрамлъун лъугьараб тадбир гьалбадерида баркана школалъул директор Шамил Гӏалиевас ва тарбия кьеялъул рахъалъ директорасул заместитель Муслимат Жамалудиновалъ. Гьез бицана гӏун бачӏунеб гӏелалъе миллиябщиналде рокьи кьеялъул тарбия кинаб даражаялда школалда бугебали. Бихьулеб букӏана гьеб тӏадегӏанаб даражаялда букӏинги. Школалъул учительзабазда, цӏалдохъабазда, гьезул эбел-инсуда байрам баркана чанго соналъ школалъе нухмалъи гьабурай Шаганэ Баймурзаевалъ, Зулхӏижат Идрисовалъ. Дандеруссиналда гьединго гӏахьаллъана шагьаралъул школазул цӏалдохъабиги. Гьез миллиял мацӏазда рикӏкӏана, ахӏана кучӏдул, рихьизаруна миллиял кьурдаби. Фестивалалъул бищунго тӏагӏамаб бутӏаялъе кӏудияб хӏадурлъи гьабун бугоан школалъул спортзалалда. Гьениб гӏуцӏун букӏана Дагъистаналъул щибаб миллаталъул хаслъи бихьизабулеб миллияб тепси.
Исана анцӏго сон буго гьеб фестиваль тӏобитӏулеб бугелдаса. Соналдаса соналде цӏикӏкӏунеб буго гӏун бачӏунеб гӏелалъул миллияб тарихалде рокьи. Гьеб буго нилъ рохизе ккараб хӏужа. Биччанте №58 школалъул гӏадатлъун лъугьараб гьеб этнофестивалалъ данде гьаризе республикаялъулго цӏалдохъаби ва учительзаби. Биччанте анищазул ва кочӏол куркьбазда гьелъ дунялго тиризе, Дагъистаналъул халкъазул берцинлъиялъул гӏаламалъеги бицунаго.
Шамай Хъазанбиева