2024 соналъул 2 декабралда хасаб рагъулаб операциялде жиндиего бокьун ана Тӏалхӏатов Шамил. Гьев вукӏана хъизамалда цохӏо бугеб лъимер. Гьев цӏалана ва гӏуна Махӏачхъала шагьаралда. 11 классги лъугӏизабун, ана Хасавюрталъул техникияб училищеялде цӏализе ва хадубго лъугӏизабуна Махӏачхъалаялъул автодорожнияб институт. Хӏалтӏулев вукӏана автошколалда, инженерлъун.
Гьал къояз ниж дандчӏвана Хьаргаби росулъа бахӏарчияв васасул эбел Патӏимат Мусахӏажиевагун.
— Патӏимат, цо вугев вас кин виччазе кӏварав СВОялде?
— Дица виччанищ гьев арав, вачӏана контрактги хъван, жив рагъде унев вугинги абун. Дица бихъ-бихъун бана гьеб контракт. Амма гьев кинго чӏечӏеб мехалда дун ана рагъулаб комиссариаталъул полковникасул кабинеталъуе. Гьес бихьизабуна дида васас жидехъе чанго нухалда ахӏараблъи, жив вачеян тӏирун чӏараблъи. Васгун барщун лъабго къоцин бана.
Виччаларин чӏедал, гьес дида гьарана виччан тейин, жиндие бокьун бугин гьаб ракьалда лъалкӏ тезе ва, хвезе хъван батани, бахӏарчиго хвезеги вугин абун. Шамилица кидаго абулаан Шамил имамасул заманалда гьавун вукӏаравани живгиян абун. Гьедин ана ва, Ростовалде щведал, гьев командирлъунги тана.
Досул букӏана онкология. Каспийск шагьаралда, 9 маялъул байрамалда, теракт гьабураб къоялъ, памятникалда цере тӏугьдул лъезе школалдаса гьенире рачарал лъималазда гьоркьов вукӏана гьевги. Гьениб кьвагьараб жоялъул кутакалъ, гӏодов речӏчӏарав гьесул бетӏер кьабун букӏана. Ботӏрониб бидурихьги тӏун, гьениб жаниб лъугьун букӏана опухоль. Гьедин ккараб жо букӏана мунагьал чурадил унтиги. Гьесда цадахъ рукӏарал лъималазул 11-яв хвана. Досда лъалаан жинца гӏемераб заман базе гьечӏеблъи, щайгурелъул, щиб больницаялде аниги, операция гьабизе бегьуларин гурони абичӏо.
СВОялде индал, гьужумалъ унезул цебесеб кьерде жив витӏеян абулеб букӏун буго гьес. Вахчизе гӏадаб бакӏ балагьеян абидал, дуца дун хӏалихьатавлъун гьавун вукӏинчӏогуриян кьолаан жаваб. Щиб гьабилеб, Аллагьасде аманат гьабун витӏана.
— Мун васасухъе щунги йикӏун йигоха, Патӏимат…
— Щвана. Гьев гьениве ун анцӏабилеб къоялъ бачӏана васас ахӏун, ункъабилеб къо бугила жидер я лъим, я квен бихьичӏогоян. Гьебго къоялъ къваригӏанщинабги босун ана дун васас хъулухъ гьабулеб букӏараб часталде. Дун гьениса ун анцӏго къоялдасан ритӏун руго гьел гьужумалъ. Гьениве унеб къоялъ видеобухьен гьабун цоцазда кӏалъанги рукӏана.
— Кинха дуда вас ватарав?
— Вас вугеб бакӏалде ине бегьулеб хӏал букӏинчӏо, речӏчӏулеб жоялъги дроназги тӏадецуй гьабулеб букӏиналъ. Гьенире ине бегьуларилан рагъухъаби чӏедал, машина къачӏалел васазда аскӏоб букӏараб автоматги босун, гьезде гьебги битӏизабун, дица абуна, гьаб бакӏалда нуж киналго чӏвазе ругин цадахъ дун ячинчӏониян. Цинги ячана гьение. Ватана вас. Дунго гӏажаиблъана, ункъо моцӏалъ цеве чӏварав васасул жеги бакъвачӏого батана би. Дир мурад букӏана вас вукъизе кодове щвей…
Васасул жаназаги босун дун ана Курскиялде, гьенисан — Ростовалде, гьенирго рукӏарал нилъерго магӏарул гӏолохъабаз кинабго гьабизе кколеб къагӏидаялда чура-хулун, хӏадур гьабуна жаназа, бана жаназадул как, ккун машинагун, гьевги вачун рачӏана ватӏаналде. Вас вукъана Шамхалалда.
— Патӏимат, васасул хъизан-лъимал рукӏанищ?
— Рукӏана. Гьесул йиго цо яс, исана тӏоцебесеб классалде цӏализе ине йигей. Гьев хъизангун ватӏалъун вукӏана.
— Хӏукуматалъул рахъалдасан кумек щолищ дуе?
— Щола. Дун ун йикӏана С. Меликовасухъе, гьев цӏалараб институталда мемориалияб къоно лъезе ихтияр кьеян гьаригун. Гьебги хӏадурулеб буго. Дица васасул цӏаралда мажгит базеги буго. Муфтияталъги кӏудияб кумек гьабуна, гьеб базе ракь кьуна Ленинил Комсомолалъул цӏаралда бугеб паркалда. Дие квербакъанщиназе кӏудияб баркалаги буго.
Рукъият Гӏалисултанова