Ахъбердил Мухӏамад (1803-1843)
Гьавуралдаса 220 сон
Шамил-имамасул тӏоцевесев мудир, магӏарул бахӏарчияв бодул цевехъан.
Цеве вукӏарав кӏиявго имам Гъазимухӏамадидаги Хӏамзатбегидаги цадахъ къеркьарав гьалмагъ вукӏана гьев. Шамил-имам чӏаго вукӏагоги, гьев хисизе вугев чийилан абулаан гьесда. Щайгурелъул гьев рикӏкӏунаан имамасул кваранаб кверлъун ва Имаматалда Шамилидаса хадув кӏиабилев чилъун. Магӏарулаз гьесда абулаан Ахъбердил Мухӏамадин, яги Ахъбердилавилан.
Гьесие щвана лъикӏаб лъайги гӏакълуги, цӏалана Гьаракӏуниса Сагӏид, Хӏариколоса Лаченилав, тӏоцевесев имам Гъазимухӏамад гӏадал цӏар арал гӏалимзабазухъ. Ахъбердиласда лъикӏго лъалаан магӏарул, гӏараб, лъарагӏ ва чачан мацӏал.
Кавказалда муридазул багъа-бачари баккидал, гьев лъугьана гьелъул рахъ кколев ва муридазул иш цебехун бачиналъул жигарчилъунги. Ахъбердиласе кӏудияб асар гьабулаан Гъазимухӏамадил вагӏзабаз. Гьев чӏван хадуб гьес Хӏамзатбег-имамасулги рахъ ккуна.
Амма гьесие машгьурлъи щвана Шамилил заманалда, бищунго кӏудияблъун кколеб Гьитӏинаб Чачаналъул мудирлъун гьев тедал.