Цодагьабниги пикру гьабулев чиясда бичӏчӏулеб буго, дол цере рукӏарал школалги гьанже ругелги батӏи-батӏиял бакӏал рукӏин. Дица школазул минабазулги, гьениб жаниб бугеб ремонталъулги, цӏиял партабазулги, интерактивиял доскабазулги гуро бицунеб бугеб. Мурад!? Гьанже ругел школабазул хӏалтӏул мурад щибдай? Гьанже школалда школайиланцин абулеб гьечӏо, гьеб рагӏула лъайкьеялъул учреждение.
Гьел учреждениязда хӏалтӏулел учительзаби, жидерго дарсазде хӏадуризе ва тӏадегӏанаб даражаялде дарсал кьезе регӏун тун гьечӏо, тӏаде чваххулеб бугеб кагътил цӏадалъ ва рикӏкӏентун гӏемерал тадбираз. Гьеб кагътил къадар дагьлъизабейилан живго Путиница абуниги, щибго хисараб жо гьечӏилан абулеб буго учительзабаз. Лъида гьеб бараб бугеб, щив пачалихъалъул тушман гьелда нахъа вугевалиги лъазе кӏоларо.
Унгоги гьел учреждениязда лъугьа-бахъунебги бичӏчӏулел, гьелдаги рази гьечӏел, гьедин тани гьаб дунял бортун унеб бугеб кӏкӏалалъул тӏинуги бихьулел бищун лъикӏал учительзаби, ракӏ унтун, дару гьечӏел унтаби ккун холел руго, яги, хӏехьезего кӏвечӏого, нахъе унел руго. Оц хвани – гьан, гьоко биххани – цӏулилан ругел, парахат, малъа-малъарабги гьабун, бакъ аги, къо аги, къоло щуабилеб май хехго щвагийлан руго. Гьеб политикаялъул хӏасилалда, соналдаса соналде школазда учительзаби гӏоларого ахӏиги буго.
Дагъистаналда бищунго нилъер ракӏ унтараб суал – рахьдал мацӏазул ахӏвал-хӏалалъул бицунаго абула, школазе гьел къваригӏунищила ругел, директорзабазеги ЕГЭ кьуралдаса нахъе тӏокӏаб жоялъул ургъел гьечӏилан. Эбел-инсухъ гӏенеккани – школалда божунищила ЕГЭ толеб, кьун гӏарацгун репетиторал кквечӏони, гьеб кьунцин бажаруларилан абула. Цӏех-рех гьабидал бичӏчӏана, 10-11 классалда ругел цӏалдохъаби, гӏемерисеб мехалъ школалдецин инчӏого, репетиторазухъеги хьвадун, экзаменазде хӏадурулел рукӏунел руго. Лъай кьезе учительзабиги щолел гьечӏони, тарбияги интернеталъ кьолеб бугони, рахьдал мацӏги эбел-инсуца малъизе толеб бугони, ОГЭ-ЕГЭги репетиторазухъе хьвадун кьолеб бугони… Щиб гьабулеб бакӏха школа-учреждение? Гьелъул мурад щиб?
Баху Мухӏидинова